| Пандемія COVID-19 | |
|---|---|
| Хворота | Тяжкый острый респіраторный сіндром коронавірус 2 (SaRS-CoV-2) |
| Локація | Ґлобално |
| Нуловый пацієнт | Вухан, Кітайска Народна Републіка |
| Статус | Пандемія подля СООЗ: 11. марця 2020[1] Общественна грозьба здоровлю меджінародного значіня: 30. януара 2020 – 5. мая 2023 (3 рокы, 3 місяці і 5 днів) |
| Потверджены зараженя | 775 886 783[2] |
| Потверджены смерті | 7 057 132[2] |
Пандемія COVID-19 (тыж знама як пандемія коронавіруса) є пандемія, причінена тяжкым острым респіраторным сіндромом коронавіруса 2 (анґл. severe acute respiratory syndrome coronavirus 2 ці курто SARS-CoV-2).[3] Зачала ся пандемія з спалаху інфекції в децембрі 2019 в кітайскім Вуханю. Дале ся хворота пошырила Азійов і выйшла на меджінародну уровень у році 2020. Світова орґанізація охороны здоровля обявила спалах хвороты общественнов грозьбов здоровлю меджінародного значіня (анґл. public health emergency of international concern ці курто PHEIC), а пандемійов означіла 11. марця.[1]
Позад пандемії коронавіруса было у світі велике соціалне і економічне зрушеня, і в Споєных Штатах економіка пережыла найвекшу рецесію з часів Великой депресії.[4] Пошырене было панічне купованя, од чого ся ставали дефіціты бытовых товарів. Ошколовалны інштітуції і общественны місця были часточні ці цалком заперты у многых юрісдікціях, а планованы події ся скасововали ці переносили на далшы рокы. Популарны стали дістанційны робота і школованя. Пандемія підняла вопросы дезінформації і балансу меджі общественнов охоронов здоровля і індівідуалныма правами.
.jpg)
Статус надзвычайной сітуації у общественній охороні здоровля меджінародного значіня быв одкликаный СООЗ 5. марця 2023.[5] У році 2024 хворота іщі ціркулує, але експерты уж не суть пересвідчены, же тото дотеперь пандемія.[6][7]
На авґуст 2024 CoVID-19 причінив 7 057 132[2] потверджены смерті, але тото чісло ся бере як меньше од реалной ціфры. Різны екстраполованы проґнозы потенційного реалного чісла смерти позад коронавіруса мають од 18.2 до 33.5 міліонів фаталных трафунків на новембер 2023, як голосило выданя The Economist,[8][9] і веце як 18.5 міліонів смерти на апріль 2023 подля даных америцького Інштітута статістикы за здоровля[10]. Тоты даны творять наприклад і смерті позад пріорітетів і огранічень у інштітуціях охороны здоровля, а щі позад нежеланя люди лічити ся.[11] Перша потведжена смерть ся трафила у Вуханю 9. януара 2020.[12] Пандемія CoVID-19 є пятов у рейтінґу найсмертелнішых пандемій і епідемій.
На зачатку ся сохтовало называти варіанты коронавіруса за місцями їх ідентіфікації, наприклад варіант „делта“ (B.1.617.2) раз ся кликав „індійскым варіантом“, але пізніше на тото СООЗ уж хосновала назвы ґрецькых букв.
Даякы варіанты COVID-19 были означены СООЗ як выкликаючы неспокій (англ. variants of concern ці курто VoC). Найвеце ся знають пять варіантів, котры силно ся пошырили і дістали шыроке высвітліня у медії.
Люде з єднаков інфекційов CoVID-19 можуть мати різны сімптомы. Часты сімптомы суть такы:
- головный біль;
- страта запаху і смаку (до 88% вшыткых трафунків зараженя тым ся характерізують[13][14][15]);
- забитый ніс;
- кашланя;
- біль у мускулах;
- горячка;
- діарея;
- проблемы з дыханьом;
- слабость.
Тота хворота є головно пошырена респіраторным путьом: люде вдыхають дрібны часткы, котры у воздух дають хворы на коронавірус, коли дыхають, бісідують, кашлають ці кыхають.[16][17][18][19]
Меджі способами профілактикы популарны были скіпленя (вакцінація), держаня „соціалной“ дістанції і ношіня масок на лиці у публічных місцях, перебываня дома, коли не є важной причіны быти вон, реґуларне мытя і дезінфекція рук.[20][21]
Тримле ся, же найвекшым різіковым фактором у смертности CoVID-19 быв і є старшый вік.