Wikipedio

1 di aprilo 1976. La Apple Computer Company fondesis, kom asociuro, da Steve Jobs, Steve Wozniak e Ronald Wayne. En julio 1976 Wozniak demonstris prototipo, desegnita da lu, di la unesma produkturo di la kompanio, la komputero Apple I. Ol inkluzis interpretilo por la komputero-linguo BASIC; programisti uzanta ta linguo povis unesmafoye skribar programi per ca mikra komputero, vice la granda mashini tatempe utiligita. Produktado di Apple I cesis en septembro 1977, sucedite da la Apple II, qua grandaparte esis desegnita da Wozniak. La Apple II, qua esis tre populara, esas egardata kom un de la maxim importanta di irga komputero.

25 di aprilo 1926. Ye La Scala en Milano, la opero Turandot, da Giacomo Puccini, esis unesmafoye pleata. La kompozisto mortabis ye 29 di novembro 1924, evante 65 yari; il sufrabis pro kancero di la guturo. Turandot esis ne-kompleta ye ilua morto, e ye la unesma pleado, la direktisto Arturo Toscanini cesigis la pleado meze di la triesma akto, e dicis a la audantaro: "Hike la opero finas, nam ye ca punto la maestro mortis." La opero esis plu tarde kompletigata da la kompozisto Franco Alfano.

9 di aprilo 1626. En Highgate, en Middlesex, Anglia, la filozofo e politikisto Francis Bacon mortis, evante 65 yari. Il pledis por la ciencala metodo, per qua on ganas savado nur per induktiva rezonado e sorgoza observado. Il diskursis to en ilua filozofiala verko skribita en la Latina linguo, Novum Organum, di 1620. En ilua politikala kariero, il divenis chefa legala konsilianto a la guvernerio en 1613, e ministro por judiciado en 1618; ilua politikala kariero finis en 1621, kande ilua acepti di donacaji de procesanti duktis ad akuzi di koruptado.